Mar 13 | BJR | STEP | Yísufa amaana máqakiqari rafúdamaki fufanoo miná faiqi námukiqari moó fannoo Yísuna qímaminoo qinau. Óo ufasáa rakísirafa maa-maqána qáfaa, ámiqira ooninnai áuquqaa máqafa máridanoo.

Mark 13

Yeerusaree amaana máqa rapée íaninnanara qinau.

(Mataioo 24:1-2; Ruka 21:5-6)

1 Yísufa amaana máqakiqari rafúdamaki fufanoo miná faiqi námukiqari moó fannoo Yísuna qímaminoo qinau. Óo ufasáa rakísirafa maa-maqána qáfaa, ámiqira ooninnai áuquqaa máqafa máridanoo. 2 Yísufa irisée qímaminoo qinau. Ínnee maa-firaa amiqira maaqána usakárana qáfaidee, kásooqaqee aiqáma rapéepaamma fúrufaramámbuannoo sía moo óoni narí ámuaaqa narí ámuaaqa maqee márindee ínoo máriannoo.

Yísuna ufa írimarusara níkooqaranara qinau.

(Mataioo 24:3-14; Ruka 21:7-19)

3 Yísufa Yeerusaree firaa amaana maqakiqari ráudamaki Oorifa áaqana amaana máqa adeedí márufanoo miqóo óoru óoqu marínau. Óoqu marifufaqa miná faiqi námukiqari Peetooroofa faqa Yameesafa faqa Yoohaneefa faqa Andurufa faqa minamúsa qumeé kukéeqaku narí máruqoo anirée qímamiqau. 4 Óo Yísu anée amaana máqa rapée íaninnanara anée qíannana yáiree fee amaana maqa rapéepaa íannoo fee nána ainaina kambíqafina qáfee fee óo dóo miná rapéeia aukuanafa adeedí rée foo qianáuree qufanoo Yísufa minára naamúaqira ufa óosana arasée qímanniminau. Ínnee aufarída máriaqa, sía moó fannoo ínni níkaruqiani. 6 Moómoosa anirée náriara únnaqimásee moó fannoo qinée ásauku mundírausee qifanoo moó fannoo aniréenoo qinée ásauku mundírausee qímasee moómoosa misá níkaruqifaranoo. 7 Ínnee rákira dáambeenda adeedí íriqa níanai márinara ufa kai íriqa sía múnari mínari fúrufari iaqa. Miqíra ainaina kúqaa kambíqaannoo, kambíqafinaqa sía taikára aukuana áiqarée foo qiaqa. 8 Moo máqannaasa níanaindari anirée moo máqannaasa faqa rákifaranoo, moo káraambaiqa fannoo adeedíqari ani mára moo káraambaiqa áruannoo. Maqá kásirafa aiqámai máriannoo aandaroo faqa máriannoo. Mi-ainaináusa mandá márira aurirana óorisaa kai máriannoo ánaasee faiqi máqarara innaamunaí aupúra̱andéemmiannoo.

9 Ínnee qiní ufa írimariasa aufarída máriaqa, faiqí misá poorísa ufa qímannimifaqa ínni ruúmbeeqee kóotaki quqéefaranoo. Misá ínni maréeqee amaana máqaki quqásee sáamusamu nárifaranoo. Ínnee qiní ámiqira fasaasa ufa qímannimiaqeera qiní ufasáara karaambáiqauqa faqa faiqí firaasá rakísirausa faqa nífusaa ínnee kikíqifaranoo. 10 Qiní ámiqira fasaasa ufa aiqáma máqannaasaki náaree kooroo inóo márinanoo taikárafa ínaaqíanna kambíqaannoo. 11 Misá ínni rumbásee maréeqee kóotaki quqásainaqa ínnee sía náqi fee qianau náqi fee qianau náaree qiaqa. Kóota kambíqafina Ánutufa qímannimu ufana miná kai qímannimiaqa. Aní óokinaa ufa sía aníndi máriannoo Ánutuna náaquqara maraquna fannoo narí ufa ínni níminaqa miná kai qifáranoo. 12 Faiqí misá nári níkaqaafasaauqa maréeqee kúqiranaki quqéefaranoo. Faiqí misá nári níku nísauku faqa maréeqee kúqiranaki quqéefaranoo faiqiuqáindi quándakiqa nári nínausa níkausa maréeqee kúqiranaki quqéefaranoo. 13 Aiqáma máqannaasa ínniara Yísunaindi fee qímasee fídiaqaa mánnimaqéefaranoo. Ínnee minakí máridaqa fídaqa qiní uaqée ida fífi ínafa kúqira fee Yísufa qúmira áukuanee paqúrinafa asumu márirana máraannoo.

Yeerusaree máqusai nárirafa kambíqaaninnanara qinau.

(Mataioo 24:15-28; Ruka 21:20-24)

14 Kásooqaqee ínnee náaquqara fídiaqaaímari mandainaina qáfeefaranoo mifá sía máriaqaa íraqoo Yeerusaree amaana máqaki kikíqinoo márina qáfeefaranoo. Ínnee maa-ufána ásaana rímariasa mi-ufána óosana ámiqimandee íriaqa. Mi-naaquqara mandainaináfa kikíqa mámbinaqa ínnee Yudeeaa máqa maaqaki máriasa quqásee áaqana áaqana sandámáfuaqa. 15 Mi-kamúqoo faiqí moó fannoo máaqa kooqí óorisaa máriinafa mi-ainaináfa kambíqafinana sía aneenná aináina máaqaki máraanee qía dóo miqóoqari afíaki sandáa. 16 Faiqí moó fannoo áfuqaki máriinana sía máaqai anirée aneenná qamunna áakauqa máraannee qía dóo miqóoqari kai quqásee quqúsa rakéemandee sandáa. 17 Mi-manda aukuanná nímuaqu uqá faqaa ánaaseeuqa faqa faiqi ánaaqi faqaasa faqa mandáiki marífaranoo sandáranara anúqifaranoo. 18 Ínnee maaqí qímasee innaaru qiaqa Óo Ánutu sía mi-manda aukuannáfa suara áukuana kambíqaani qiaqa sandáranara anúqi foora. 19 Mi-manda aukuanáfa aniráinaqa aiqámausa aupúraranaki firaanáki márifaranoo. Óoqai indaarú Ánutufa aiqáma ainaina áuqunakiqari káqiqaa aupurarafa óosana óosana márinau, maqee faqa miqíkai ídanoo káqiqaa aupurarafa máridanoo. Kásooqaqee firaafá uqanna kambíqaannoo. Mifá taikáinna kari sía miqírafa kambíqaannoo. 20 Mi-manda aupurara aukuanná Ánutufa qúsandaannoo, sía qúsarainanoo aiqáma kuqu taikée foora. Ánutufa narí rusandeesámumásee maróosara iriséenoo mi-aukuanná qúsaramánnisáannoo.

21 Mi-manda aukuanná faiqí moó fannoo ínniara maí qáfaaqa, ásauku mundírafa mai márinoo moó fannoo ásauku mundírafa muanní márinoo qínnana sía mi-fasiqána ufa íriaqa miná únnaqidanoo. 22 Únnaqimaría ásauku mundírausa faqa únnaqi mária tamummaqara fasiqáusa faqa miqíra aukuana moómoo kambíqeefaranoo. Misá Ánutuna rusandeesámumandee maraqoo fasiqa anaaseesa níkaru qiani qímaseenoo náaquqara ainaina faqa sía faiqí amanaikímari ainaina faqa áuqusaifanoo kambíqaannoo. Mi-ainainánnai níkaruqiani qímasaifanoo sía amanaikíannoo. 23 Qinée ínniqa qiní faiqi námu mi-ainainná sía kambíooqoo qímannimiqa minára aufarída kai máriaqa.

Yísufa narí innaarúnaindari qúmuanínnanara qímanniminau.

(Mataioo 24:29-31; Ruka 21:25-28)

24 Mi-manda aupurara aukuannáfa taikáfinoo asukuna fannoo súani áruannoo aiqámai asukuna kai arufúannoo quqoona faqa sía kafáa káaqa qáannoo fasáuqa faqa inaarúnaindari aiqáma kapikeefáranoo. Innaarúnai fásau faqa quqoona faqa nímari aanafa dapikámmafuannoo. 26 Miqóo qinée faiqí nímaaku asurukí kooroo ianáura, qinée firaa afeeka námufaqa firaa areenarana námufaqa minakí kooroo ianáura. 27 Mi-karí qinée qeeqá qangiroouqa niqiqáanaqa misá aiqáma máqa maaqa áti átinni óonuree anirée mándeeqa Ánutuna rusandeesámumandee mároosa maramáree qinée márianannai nífiqee ánifaranoo.

Narí qúmmuarínnanara saqári ámmuni kikiqa úsinau.

(Mataioo 24:32-35; Ruka 21:29-33)

28 Yísufa káqi qímannimidanoo narí faiqi námu qímanniminoo qinau. Ínnee faafísa fooqáa ira saqari qáfamasee miná óosanara íriaqa, mi-saqarífa ámmuni mámbinaqa ínnee minára saika áukuanee qifáranoo. 29 Ínnee miqí kai másee mi-oosana oosana ainainnára qúnafa kambíqainaqa taikára aukuana adeedí áfaisaammi foo qiaqa. 30 Ínnee maaná faqa irisée sía aunúaqa maa-ainainnáusara aiqáma qúnafa máa maqee mária fasiqa anaaseesa akaqáusa káqi mária kamuqoo kambíqaannoo. 31 Innaarúna faqa maqá faqa aiqáma fatíkámafi áqusaannoo qiní dóokinaa ufa fannoo kai náaru náaru sía taikáannoo, káqi maríannoo.

Narí qúmmuanínnanara áfu máqaida rakísianee qinau.

(Mataioo 24:36-44)

32 Mi-taikara aukuannáfa ánianínnanara sía moó fannoo íridanoo mi-faasaannára faqa súani yáqoo kamuqoo márinanoo fee kambíqaannoo fee, innaarúnaindaraa qangiroouqa faqa qinée Ánutuna ámaaku faqa síamma íridaqa qiní qíkoofa narí kai miná íridanoo. Ínnee mi-faasaannára sía írimariafanoo. 33 Ínnee minára aufarídaqa rakísidaqa qáfaaqa. 34 Mi-faasaanná faiqí moorá foora aináina faqaafára foora máriannoo. Mi-fasiqáfa narí aináinirana óosana óosana narí aináinira faiqiuqa áadu áadu nísaukuki quqáseenoo eendáki aufaríra fasiqa qímaminoo anée aiqáma ainainasaa ámiqimasee rakísia qinée moosáa fídaqa qímasee finau. 35 Ínnee miqíkai mándee ámiqimandee aufarída máriaqa. Ínni úriqararafa kaiqáa ánianínnanara sía íri maríafanoo mifá eendáki ániannoo fee eendá ámuqusai fee maqee káari máqarana namufaqee aniráannoo fee súani maqee ururáinanoo fee aniráannoo fee. 36 Mifá tautúmmámaqasee aináinímarinna kamuqoo faiqaqée ínnanaki qumuráinana mandáikamminnaranoo. 37 Minára maqee qinée ínni qímannimidaqa aiqámausa qímannimidaqa ínnee aiqámausara aufariaqée qídaqa qinée qúmiranara rakísida máriaqa.